Singer Mangli: పాన్ ఇండియా సినిమాలో హీరోయిన్‌గా..

టాలీవుడ్‌లో ‘కన్నే అదిరింది’ (Kanne Adirindi) అనే పాటతో సెన్సేషన్‌ గాయని (Singer)గా గుర్తింపు పొందిన మంగ్లి తాజాగా పాన్‌ ఇండియా చిత్రంలో నటించబోతోంది. చక్రవర్తి చంద్రచూడ్‌ దర్శకత్వంలో తెరకెక్కుతున్న ‘పాదరాయ’(Padaraya)తో మంగ్లీ హీరోయిన్‌గా మారనుంది. ఈ మూవీ టైటిల్‌ను బెంగుళూరులో తాజాగా ఆవిష్కరించారు. తెలుగుతో పాటు శాండల్‌వుడ్‌లోనూ అనేక సినిమాల్లో పాటలు పాడిన మంగ్లి కన్నడిగుల అభిమానాన్ని కూడా చూరగొన్నారు. శాండల్‌వుడ్‌లో పెద్ద సంఖ్యలో అభిమానులను సంపాదించుకున్నారు.

ప్రస్తుతం ఈ సినిమా ప్రీ ప్రొడక్షన్‌ పనులు శరవేగంగా సాగుతున్నాయి. చిత్రీకరణకు ముందు హీరో నాగశేఖర్‌ 42 రోజుల పాటు హనుమద్‌ వ్రతాన్ని పాటించనున్నారు. అంజనాద్రి కొండల్లో ఆయన మాల ధరించారు. 2013-14లో జరిగిన యదార్థ ఘటన ఆధారంగా ఈ సినిమా ఆరు రాష్ట్రాలతో లింక్‌ కలిగి ఉండనుండటం మరో విశేషం. త్వరలోనే సినిమా చిత్రీకరణ ప్రారంభం కానుందని తారాగణం ఎంపిక ఇంకా జరుగుతోందని దర్శకుడు చంద్రచూడ్‌ మీడియాకు తెలిపారు. సిద్ధేశ్వర ఎంటర్‌ప్రైజెస్‌ పతాకంపై ఆర్‌ చంద్రు ఈ చిత్రాన్ని నిర్మిస్తున్నారు. అజనీశ్‌ లోకనాథ్ సంగీతాన్ని అందిస్తున్నారు.