AP Election 2024: నారా లోకేశ్‌ని కలిసిన టాలీవుడ్ ప్రముఖ హీరో నిఖిల్.. ఎందుకంటే..?

టాలీవుడ్ ప్రముఖ హీరో నిఖిల్ సిద్ధార్థ యాదవ్.. తెలుగుదేశం పార్టీ జాతీయ ప్రధాన కార్యదర్శి నారా లోకేశ్‌ను కలిశారు. దీంతో ఆయన తెలుగుదేశం పార్టీలో చేరారంటూ ఒక్కసారిగా వార్తలు వచ్చాయి. దీనిపై హీరో నిఖిల్ క్లారిటీ ఇచ్చారు. కాగా తాను టీడీపీలో చేరలేదని హీరో నిఖిల్ క్లారిటీ ఇచ్చారు. తన మావయ్య ఎంఎం కొండయ్య చీరాల అసెంబ్లీ స్థానం నుంచి పోటీ చేసేందుకు టికెట్ ఇచ్చినందుకు ధన్యవాదాలు తెలిపేందుకు వెళ్లానని ఆయన వివరించారు. ప్రజలకు సేవ చేసే అవకాశాన్ని తమ కుటుంబానికి కల్పించినందుకు నారా లోకేశ్‌కు ధన్యవాదాలు తెలిపానని తెలిపారు.

కాగా టీడీపీ శుక్రవారం 9 అసెంబ్లీ స్థానాలు, 4 లోక్‌సభ స్థానాలకు అభ్యర్థులను ప్రకటించిన విషయం తెలిసిందే. మరోవైపు ఏపీ అసెంబ్లీ (AP Election 2024), లోక్‌సభ ఎన్నికలకు (Lok Sabha polls2024) ముందు తెలుగుదేశం పార్టీలోకి వలసలు కొనసాగుతున్నాయి. ఇప్పటికే కీలక నేతలు, పలు చోట్ల పెద్ద సంఖ్యలో కార్యకర్తలు టీడీపీలో చేరారు.