జింబాబ్వే టూర్‌కు జితేష్‌, సుదర్శన్‌, హర్షిత్‌

తొలి రెండు టీ20లకు

దూబే, జైస్వాల్‌, శాంసన్‌ దూరం

న్యూఢిల్లీ: జింబాబ్వే టూర్‌కు ఎంపిక చేసిన భారత జట్టులో మరో మూడు మార్పులు చోటు చేసుకొన్నాయి. ఐదు టీ20ల సిరీ్‌సలో భాగంగా జరిగే తొలి రెండు మ్యాచ్‌లకు ఇదివరకే జట్టుకు ఎంపికైనా సంజూ శాంసన్‌, శివమ్‌ దూబే, యశస్వి జైస్వాల్‌ స్థానంలో సాయి సుదర్శన్‌, జితేష్‌ శర్మ, హర్షిత్‌ రాణాలను ఎంపిక చేశారు. టీ20 వరల్డ్‌కప్‌ విన్నింగ్‌ జట్టులో శాంసన్‌, దూబే, జైస్వాల్‌ సభ్యులు. వీరు నేరుగా జింబాబ్వే వెళ్లి జట్టుతో కలవాల్సి ఉన్నా.. బార్బడోస్‌లో హరికేన్‌ కారణంగా అక్కడే ఉండిపోయారు. దీంతో మిగతా ఆటగాళ్లతో కలసి ఈ ముగ్గురు కూడా ప్రత్యేక విమానంలో బుధవారం భారత్‌ రానున్నారు. ఆ తర్వాత విశ్వవిజేతలను ప్రధాని నరేంద్ర మోదీ సత్కరించే కార్యక్రమంలో ఈ ముగ్గురు కూడా పాల్గొంటారు. ఆ తర్వాతే వీరు జింబాబ్వే సిరీస్‌ కోసం హరారే వెళతారు.

ఈ నేపథ్యం లో వీరి స్థానంలో తొలి రెండు మ్యాచ్‌లకు సుదర్శన్‌, జితేష్‌, హర్షిత్‌లను ఎంపిక చేశారు. ఇక.. రింకూ, ఖలీల్‌ అహ్మద్‌ కూడా టీమిండియాతోనే ఉన్నా.. వారి స్థానాలను మాత్రం భర్తీ చేయలేదు. కాగా, ఈనెల 6 నుంచి జరిగే సిరీస్‌ కోసం భారత యువ జట్టు మంగళవారం జింబాబ్వే బయల్దేరింది. ఇక, జింబాబ్వే సిరీస్‌కు జట్టు కెప్టెన్‌గా ఎంపికైన శుభ్‌మన్‌ గిల్‌ అమెరికాలో జట్టుతో కలువనున్నాడు.