IPL 2025, MI vs KKR: ముంబై తొలి గెలుపు.. కోల్‌కతాపై సునాయాస విజయం

ABN , Publish Date - Mar 31 , 2025 | 10:24 PM

వరుస పరాజయాలతో సతమమతమవుతున్న ముంబై ఇండియన్స్ స్వంత మైదానంలో జూలు విదిల్చింది. ముంబైలోని వాంఖడే స్టేడియంలో కోల్‌కతా నైట్ రైడర్స్‌తో జరిగిన మ్యాచ్‌లో ముంబై ఇండియన్స్ జట్టు ఘన విజయం సాధించింది. 8 వికెట్ల తేడాతో కోల్‌కతాను చిత్తు చేసింది.

IPL 2025, MI vs KKR: ముంబై తొలి గెలుపు.. కోల్‌కతాపై సునాయాస విజయం

Ryan Rickelton

వరుస పరాజయాలతో సతమమతమవుతున్న ముంబై ఇండియన్స్ స్వంత మైదానంలో జూలు విదిల్చింది. ముంబైలోని వాంఖడే స్టేడియంలో కోల్‌కతా నైట్ రైడర్స్‌తో జరిగిన మ్యాచ్‌లో ముంబై ఇండియన్స్ జట్టు ఘన విజయం సాధించింది (KKR vs MI). 8 వికెట్ల తేడాతో కోల్‌కతాను చిత్తు చేసింది. తొలి మ్యాచ్ ఆడుతున్న బౌలర్ అశ్వని కుమార్ 4 వికెట్లతో చెలరేగడంతో కోల్‌కతా స్వల్ప స్కోరుకే ఆలౌటైంది. స్వల్ప స్కోరును ముంబై బ్యాటర్లు సునాయాసంగా ఛేజింగ్ చేశారు.

ఈ మ్యాచ్‌లో టాస్ గెలిచిన హార్దిక్ పాండ్యా బౌలింగ్ ఎంచుకున్నాడు. దీంతో కోల్‌కతా టీమ్ బ్యాటింగ్‌కు దిగింది. కెప్టెన్ హార్దిక్ నమ్మకాన్ని నిలబెట్టిన ముంబై బౌలర్లు కోల్‌కతాను ఆదిలోనే దెబ్బతీశారు (IPL 2025). 116 పరుగులకే ఆలౌట్ చేశారు. తొలి మ్యాచ్ ఆడుతున్న ముంబై బౌలర్ అశ్వని కుమార్ 4 వికెట్లు తీసి కోల్‌కతా పతనాన్ని శాసించాడు. రఘువంశీ (26), రమణ్‌దీప్ (22) మాత్రం 20కి పైన పరుగులు చేశారు. నరైన్ (0), డికాక్ (1), రహానే (11), వెంకటేష్ అయ్యర్ (3), రింకూ సింగ్ (17), మనీష్ పాండే (19), రస్సెల్ (5) విఫలమయ్యారు. ముంబై బౌలర్లలో తొలి మ్యాచ్ ఆడుతున్న అశ్వని కుమార్ 4 వికెట్లు పడగొట్టాడు. దీపక్ చాహర్ రెండు వికెట్లు తీశాడు. బౌల్ట్, హార్దిక్, విఘ్నేష్ పుత్తుర్, శాంట్నర్ ఒక్కో వికెట్ తీసుకున్నారు.

అనంతరం ఛేజింగ్‌కు దిగిన ముంబై సునాయాసంగా లక్ష్యాన్ని ఛేదించింది. రోహిత్ శర్మ (13) త్వరగానే ఔటైనా, మరో ఓపెనర్ రికెల్టన్ (62) అద్భుతమైన హాఫ్ సెంచరీతో చెలరేగి ముంబై విజయాన్ని సునాయాసంగా మార్చేశాడు. విల్ జాక్స్ (16) రెండో వికెట్‌గా వెనుదిరిగాడు. సూర్యకుమార్ (27) లాంఛనాన్ని పూర్తి చేశాడు. దీంతో కోల్‌కతా నిర్దేశించిన 117 పరుగుల లక్ష్యాన్ని ముంబై 12.5 ఓవర్లలోనే ఛేదించింది. ఆండ్రూ రస్సెల్ రెండు వికెట్లు దక్కించుకున్నాడు. కాగా, ఈ సీజన్‌లో ముంబైకి ఇది తొలి విజయం కాగా, కోల్‌కతాకు ఈ సీజన్‌లో రెండో ఓటమి.