MS Dhoni: ఐపీఎల్ బాగానే ఉంది.. మరింత మసాలా అవసరం లేదు: ఇంపాక్ట్ ప్లేయర్ రూల్‌పై ధోనీ స్పందన

ABN , Publish Date - Mar 24 , 2025 | 05:59 PM

ఐపీఎల్‌లో ఇంపాక్ట్ ప్లేయర్ అంటూ 2023లో ప్రవేశపెట్టిన కొత్త వెసులుబాటు పెద్ద చర్చనీయాంశంగా మారింది. ఈ నియమం ప్రకారం.. ఓ జట్టు ఒక ఆటగాడిని మరొక ఆటగాడితో భర్తీ చేసుకోవచ్చు. ఉదాహరణకు ఓ జట్టు బౌలింగ్ పూర్తి చేసిన తర్వాత, తమ బౌలర్‌ను ఓ బ్యాటర్‌తో భర్తీ చేసుకోవచ్చు.

MS Dhoni

ఐపీఎల్‌లో (IPL 2025) ఇంపాక్ట్ ప్లేయర్ అంటూ 2023లో ప్రవేశపెట్టిన కొత్త వెసులుబాటు పెద్ద చర్చనీయాంశంగా మారింది. ఈ నియమం ప్రకారం.. ఓ జట్టు ఒక ఆటగాడిని మరొక ఆటగాడితో భర్తీ చేసుకోవచ్చు. ఉదాహరణకు ఓ జట్టు బౌలింగ్ పూర్తి చేసిన తర్వాత, తమ బౌలర్‌ను ఓ బ్యాటర్‌తో భర్తీ చేసుకోవచ్చు. అంటే బౌలింగ్ ఒకరితో, బ్యాటింగ్ మరొకరితో చేయించుకోవచ్చు. ఇది జట్టుకు అదనపు ప్రయోజనాన్ని ఇస్తుంది. అయితే, ఈ ఇంపాక్ట్ ప్లేయర్ (Impact player) అనేది అంతర్జాతీయ ఫార్మాట్‌లో అందుబాటులో లేదు.

ఈ ఇంపాక్ట్ ప్లేయర్ నిబంధనను చాలా మంది మాజీలు తప్పు పడుతున్నారు. ఈ నిబంధన కారణంగా ఆల్ రౌండర్ల అవసరం తగ్గుతుందని అభిప్రాయపడుతున్నారు. చెన్నై సూపర్ కింగ్స్ స్టార్ ఎంఎస్ ధోనీ (MS Dhoni) కూడా ఈ నిబంధన పట్ల అంత సానుకూలంగా లేడు. 2024లో ధోనీ కూడా ఇంపాక్ట్ ప్లేయర్‌గా బరిలోకి దిగినప్పటికీ, 2023లో మాత్రం ఈ నిబంధనను వ్యతిరేకించాడు. ఇంపాక్ట్ ప్లేయర్‌ గురించి 2023లో ఓ ఇంటర్వ్యూలో మాట్లాడుతూ.. ఐపీఎల్ ప్రస్తుతం మంచి స్థానంలో ఉందని, దానికి మరింత మసాలా యాడ్ చేయాల్సిన అవసరం లేదని వ్యాఖ్యానించాడు.

* ఐపీఎల్ నిజంగా అద్భుతం. నాణ్యమైన క్రికెట్ ఆడుతున్నాం. ప్రతిభావంతులైన క్రికెటర్లు వస్తున్నారు. యువ క్రికెటర్లకు మంచి వేదిక దొరికింది. టీఆర్‌పీ బాగుంది. అది చాలు.. ఇంపాక్ట్ ప్లేయర్ అనేది ఆల్‌రౌండర్ల అవసరాన్ని తగ్గిస్తుంది * అని ధోనీ వ్యాఖ్యానించాడు. ఇక, చెన్నై కెప్టెన్సీ విషయంలో కూడా ధోనీ స్పందించాడు. మ్యాచ్‌కు సంబంధించి 99 శాతం నిర్ణయాలన్నీ రుతురాజ్ మాత్రమే తీసుకుంటాడని, తాను కేవలం అతడికి అప్పుడప్పుడు సలహాలు మాత్రమే ఇస్తుంటానని ధోనీ చెప్పాడు.