అండమాన్‌ దగ్గర 6 టన్నుల డ్రగ్స్‌
ABN , Publish Date - Nov 26 , 2024 | 03:20 AM
భారత తీర గస్తీ దళం అండమాన్‌ దీవుల దగ్గర భారీ ఎత్తున మాదక ద్రవ్యాలను స్వాధీనం చేసుకుందని సోమవారం అధికారులు వెల్లడించారు.
విలువ రూ.25 వేల కోట్లు
ఆరుగురు మయన్మార్‌ జాతీయుల అరెస్టు
తీర గస్తీ దళం నిఘా విమానం ద్వారా గుర్తింపు
పోర్టుబ్లెయిర్‌, నవంబరు 25: భారత తీర గస్తీ దళం అండమాన్‌ దీవుల దగ్గర భారీ ఎత్తున మాదక ద్రవ్యాలను స్వాధీనం చేసుకుందని సోమవారం అధికారులు వెల్లడించారు. ఆరు టన్నుల(6వేల కిలోల) ఈ మాదక ద్రవ్యాల(కాంట్రాబాండ్‌ మెథంఫెటమైన్‌) విలువ అంతర్జాతీయ మార్కెట్‌లో రూ.25000 కోట్లు ఉంటుందని అంచనా. వీటిని ఒక్కోటి రెండేసి కేజీల చొప్పున 3000 ప్యాకెట్లుగా తయారుచేసి తరలిస్తున్నారు. ఈ నెల 23న అండమాన్‌ దీవుల వద్ద పహరా కాస్తున్న తీర గస్తీ దళం విమానం(డార్నియర్‌) పైలెట్‌ బ్యారెన్‌ దీవి దగ్గర అనుమానాస్పదంగా సంచరిస్తున్న చేపల వేట ట్రాలర్‌ని గుర్తించారు. వెంటనే ఆ ట్రాలర్‌లో ఉన్నవారిని దాన్ని ఆపాలని హెచ్చరించి, అండమాన్‌, నికోబార్‌లోని తమ కమాండ్‌కి సమాచారం ఇచ్చారు. దీంతో దగ్గరలో ఉన్న తీర గస్తీదళం పడవలు వేగంగా అక్కడికి చేరుకుని ఆ ట్రాలర్‌ని పోర్ట్‌బ్లెయిర్‌కి తీసుకువచ్చాయి. అందులో ఉన్న ఆరుగురు మయన్మార్‌ జాతీయులను అరెస్టు చేశారు. ట్రాలర్‌లో ఉన్న మాదక ద్రవ్యాలను భారత్‌, దాని పొరుగు దేశాలకు సరఫరా చేసేందుకే తరలిస్తున్నారని భావిస్తున్నారు.
