IPL 2025, CSK vs RR: చెలరేగిన రాజస్తాన్ బ్యాటర్లు.. చెన్నై టార్గెట్ ఎంతంటే

ABN , Publish Date - Mar 30 , 2025 | 09:21 PM

గౌహతిలోని బర్సాపార క్రికెట్ స్టేడియంలో జరుగుతున్న మ్యాచ్‌లో చెన్నై సూపర్ కింగ్స్ జట్టుతో రాజస్తాన్ రాయల్స్ తలపడుతోంది. నితీష్ రాణా (36 బంతుల్లో 5 సిక్స్‌లు 10 ఫోర్లతో 81) మెరుపు హఫ్ సెంచరీతో చెలరేగడంతో ఆర్ఆర్ నిర్ణీత 20 ఓవర్లలో 9 వికెట్లు కోల్పోయి 182 పరుగులు చేసింది

IPL 2025, CSK vs RR: చెలరేగిన రాజస్తాన్ బ్యాటర్లు.. చెన్నై టార్గెట్ ఎంతంటే

Nitish Rana

గత రెండు మ్యాచ్‌ల్లో అటు బౌలింగ్, ఇటు బ్యాటింగ్ విభాగాల్లో విఫలమై ఓటములు చవిచూసిన రాజస్తాన్ రాయాల్స్ టీమ్ తాజా మ్యాచ్‌లో జూలు విదిల్చింది. గౌహతిలోని బర్సాపార క్రికెట్ స్టేడియంలో జరుగుతున్న మ్యాచ్‌లో (IPL 2025) చెన్నై సూపర్ కింగ్స్ జట్టుతో రాజస్తాన్ రాయల్స్ తలపడుతోంది. నితీష్ రాణా (36 బంతుల్లో 5 సిక్స్‌లు 10 ఫోర్లతో 81) మెరుపు హఫ్ సెంచరీతో చెలరేగడంతో ఆర్ఆర్ నిర్ణీత 20 ఓవర్లలో 9 వికెట్లు కోల్పోయి 182 పరుగులు చేసింది (RR vs CSK).

ఈ మ్యాచ్‌లో చెన్నై కెప్టెన్ రుతురాజ్ టాస్ గెలిచి బౌలింగ్ ఎంచుకున్నాడు. దీంతో రాజస్తాన్ రాయల్స్ జట్టు బ్యాటింగ్‌కు దిగింది. తొలి బంతికి చక్కటి టైమింగ్‌తో బౌండరీ రాబట్టిన యశస్వి జైస్వాల్ (4) ఆడిన మూడో బంతికే ఖలీల్ అహ్మద్ బౌలింగ్‌లో అవుటయ్యాడు. అయితే నితీష్ రాణా చెలరేగడంతో పవర్ ప్లేలో రాజస్తాన్ భారీ స్కోరు సాధించింది. రియాన్ పరాగ్ (37) చెప్పుకోదగిన స్కోరు సాధించాడు. సంజూ శాంసన్ (16 బంతుల్లో 21) మంచి ఆరంభాన్ని సద్వినియోగం చేసుకోలేకపోయాడు. ఆ తర్వాత వచ్చిన ధ్రువ్ జురెల్ (3), హసరంగ (4) పెద్దగా రాణించలేదు. చివర్లో హిట్‌మెయర్ (19) కీలకమైన పరుగులు చేశాడు.

ఆరంభంలో ధారాళంగా పరుగులు ఇచ్చిన చెన్నై బౌలర్లు చివర్లో పుంజుకున్నారు. చెన్నై బౌలర్లలో నూర్ అహ్మద్, పతిరణ, ఖలీల్ అహ్మద్ రెండేసి కీలక వికెట్లు తీశారు. అశ్విన్, రవీంద్ర జడేజా ఒక్కో వికెట్ తీశారు. దీంతో ఆర్‌ఆర్ నిర్ణీత 20 ఓవర్లలో 9 వికెట్లు కోల్పోయి 182 పరుగులు చేసింది. చెన్నై ముందు 183 పరుగుల లక్ష్యాన్ని ఉంచింది. మరి, కాస్త బలహీనంగా కనిపిస్తున్న చెన్నై బ్యాటింగ్ విభాగం ఈ టార్గెట్‌ను ఎలా ఛేదిస్తుందో చూడాలి.