Allu Arjun - Pushpa: రష్యాలో కూడా తగ్గేదేలే!

టాలీవుడ్‌ సినిమా స్థాయి పెరిగింది, విదేశాల్లో కూడా తెలుగు సినిమా హవా నడుస్తోంది. రాజమౌళి దర్శకత్వం వహించిన ‘ఆర్‌ఆర్‌ఆర్‌’ ఇప్పటికే పలు దేశాల ప్రేక్షకులను విపరీతంగా ఆకట్టుకుంది. ఇప్పుడు ఐకాన్‌స్టార్‌ (Icon star)అల్లు అర్జున్‌ (allu arjun) నటించిన ‘పుష్ప’ (Pushpa in Russian language)వంతు వచ్చింది. ప్యాన్‌ ఇండియా స్థాయిలో విజయం సాధించిన ఈ చిత్రం తాజాగా  రష్యాలో సినీ ప్రియులను ఆకట్టుకునేందుకు సిద్ధమవుతోంది. సెప్టెంబర్‌లో జరిగిన మాస్కో ఇంటర్నేషనల్‌ ఫిల్మ్‌ ఫెస్టివల్‌లో ఈ సినిమాను రష్యన్‌ సబ్‌టైటిల్స్‌తో(Pushpa Russian Sub titles) ప్రదర్శించిన సంగతి తెలిసిందే. ఈ వేదిక మీదే ఈ చిత్రాన్ని రష్యన్‌ డబ్బింగ్‌ వర్షన్‌ను విడుదల చేయనున్నట్లు ప్రకటించారు నిర్మాతలు. తాజాగా తేదీని వెల్లడించారు. డిసెంబర్‌ 8న ‘పుష్ప’ చిత్రాన్ని అక్కడ విడుదల చేయనున్నట్లు మైత్రీ మూవీ మేకర్స్‌ సంస్థ ట్వీట్‌ చేసింది. ఈ మేరకు పోస్టర్‌ను విడుదల చేసి, మంగళవారం ఉదయం 11.04 నిమిషాలకు రష్యన్‌ భాషలో ట్రైలర్‌ను విడుదల చేయనున్నట్లు పేర్కొంది. డిసెంబర్‌ 1న మాస్కోలో, 3న సెయింట్‌ పీటర్స్‌బర్గ్‌లో ప్రీమియర్స్‌ వేయనున్నారు. అలాగే చిత్ర బృందం కూడా అక్కడ ప్రేక్షకులను పలకరించనున్నారు. 

ప్రస్తుతం బన్నీ, సుకుమార్‌ (Sukumar)‘పుష్ప 2’ సినిమా షూటింగ్‌తో బిజీగా ఉన్నారు. మొదటి పార్ట్‌ సూపర్‌హిట్‌ కావడంతో పుష్ప-2పై భారీ అంచనాలు ఏర్పడ్డాయి. దానిని దృష్టిలో పెట్టుకుని మరింత హంగులతో  రెడీ చేయడానికి  సుకుమార్‌ బృందం సిద్ధమవుతోంది. ప్రస్తుతం రామోజీ ఫిల్మ్‌ సిటీలో వేసిన ప్రత్యేకమైన సెట్లో కీలక సన్నివేశాల చిత్రీకరణ జరుగుతున్నట్లు తెలుస్తోంది.