విజయోత్సాహం

సంబరాల్లో టీడీపీ శ్రేణులు

సాలూరు/కురుపాం/జియ్యమ్మవలస, మార్చి 24: ఎమ్మెల్యే కోటా ఎమ్మెల్సీ ఎన్నికల్లో టీడీపీ సంచలన విజయం సాధించడంతో శుక్రవారం జిల్లావ్యాప్తంగా శ్రేణులు సంబరాలు చేసుకున్నారు. ఆనందోత్సాహాలతో సందడి చేశారు. సాలూరులోని తన నివాసంలో పార్టీ నాయకులు, కార్యకర్తల సమక్షంలో పొలిట్‌ బ్యూరో సభ్యురాలు గుమ్మిడి సంధ్యారాణి కేక్‌ కట్‌ చేసి మిఠాయిలు పంచారు. అనంతరం మాజీ ఎమ్మెల్యే ఆర్పీ భంజ్‌దేవ్‌ తదితరులతో కలిసి విలేఖర్లతో మాట్లాడారు. ఎమ్మెల్యే కోటలో ఎమ్మెల్సీ ఎన్నికలో తెలుగుదేశం పార్టీ బలపరిచిన అభ్యర్థి పంచుమర్తి అనురాధ అనుహ్య విజయంతో వైసీపీ శ్రేణులకు దిమ్మతిరిగి మైండ్‌ బ్లాక్‌ అయ్యిందని ఆమె అన్నారు. సీఎం జగన్‌మోహన్‌రెడ్డిని పట్టభద్రులే కాదు.. ఆ పార్టీ ఎమ్మెల్యేలు కూడా నమ్మడం లేదన్నారు. సార్వత్రిక ఎన్నికల్లో తెలుగుదేశం పార్టీ విజయఢంకా మోగిస్తుందని తెలిపారు. ఇదిలా ఉండగా కురుపాం కోటలో కేంద్ర మాజీ మంత్రి, టీడీపీ సీనియర్‌ నాయకులు వైరిచర్ల కిషోర్‌ చంద్ర సూర్యనారాయణదేవ్‌ సమక్షంలో నియోజకవర్గ ఇన్‌చార్జి జగదీశ్వరి కేక్‌ కట్‌ చేసి సంబరాలు చేసుకున్నారు. ఈ సందర్భంగా కిషోర్‌దేవ్‌ మాట్లాడుతూ.. నాయకులు, కార్యకర్తలు ఐక్యతతో పనిచేసి పార్టీ బలోపేతానికి మరింతగా కృషి చేయాలని కోరారు. ఇక చినమేరంగి కోటలో మాజీ ఎమ్మెల్సీ శత్రుచర్ల విజయరామరాజు ఆధ్వర్యంలో శ్రేణులు సంబరాలు చేసుకున్నారు. తెలుగుదేశం పార్టీ అధినేత చంద్రబాబు ప్రణాళికతోనే విజయం వరించిందని ఆయన అన్నారు. ఆయా ప్రాంతాల్లో జరిగిన కార్యక్రమాల్లో పెద్దఎత్తున పార్టీ నాయకులు కార్యకర్తలు పాల్గొన్నారు.