Women Bill: మహిళల్ని మోసం చేస్తున్నారు.. మహిళా రిజర్వేషన్ బిల్లుపై నిప్పులు చెరుగుతున్న విపక్షాలు

మంగళవారం కొత్త పార్లమెంట్ భవనంలో తొలి సెషన్‌లో భాగంగా మహిళా రిజర్వేషన్ బిల్లును ప్రవేశపెట్టిన విషయం తెలిసిందే. కేంద్రమంత్రి అర్జున్ రామ్ మేఘ్వాల్ ప్రవేశపెట్టిన ఈ బిల్లుపై సెప్టెంబర్ 20వ తేదీన చర్చ జరుగుతుంది. ఈ సందర్భంగా.. మహిళల అభివృద్ధిపై దృష్టి సారించాలని ప్రధాని మోదీ పిలుపునిచ్చారు. మహిళల అభివృద్ధి గురించి కేవలం మాట్లాడటం మాత్రమే సరిపోదని ఈ ప్రపంచం అర్థం చేసుకుందని.. ఇది సానుకూల దశ అని అన్నారు. ఈ బిల్లును స్వాగతిస్తూ.. కొన్ని ప్రతిపక్ష పార్టీలు తమ మద్దతు ప్రకటించాయి. అయితే.. కాంగ్రెస్, ఆమ్ ఆద్మీ పార్టీలు మాత్రం నిప్పులు చెరిగాయి. వచ్చే ఎన్నికల్లో తమకు బూస్ట్ అవుతుందనే ఉద్దేశంతోనే.. బీజేపీ ఇన్నాళ్లూ ఈ బిల్లుని ఆలస్యం చేసిందని విమర్శించాయి.

ఈ బిల్లుపై ఆప్ ఎమ్మెల్యే అతిషి మాట్లాడుతూ.. మహిళల సమస్యల్ని బీజేపీ తన అస్త్రంగా మార్చుకోవాలని చూస్తోందని ఆరోపించారు. నిశితంగా చదివితే.. ఇది మహిళల్ని మోసం చేసే బిల్లు అని అర్థం చేసుకోవచ్చని ధ్వజమెత్తారు. 2029 ఎన్నికల ముందు వరకు ఈ బిల్లు అమల్లోకి వచ్చే అవకాశం లేకపోవడంతో.. ఢిల్లీ మంత్రి అసంతృప్తి వ్యక్తం చేశారు. దీనికితోడు.. మొదటి డీలిమిటేషన్ లేదా నియోజకవర్గాల పునర్నిర్మాణం తర్వాత మాత్రమే ఇది అమలు చేయబడుతుంది. అంతేకాదు.. ఇది 2027లో జరిగే జనాభా లెక్కలపై ఆధారపడి ఉంటుంది. దీంతో.. ఈ నిబంధనల్ని ఎందుకు చేర్చారని అతిషి ప్రశ్నించారు. దీనర్థం 2024 ఎన్నికల్లోపు మహిళా రిజర్వేషన్ బిల్లును ఆమోదించడం సాధ్యం కాదని స్పష్టమైపోయిందన్నారు. ఈ నిబంధనల్ని తొలగించి.. రిజర్వేషన్ బిల్లుని అమలు చేయాలని తాము డిమాండ్ చేస్తున్నామన్నారు. ఈ భిల్లుకు ఆప్ సూత్రప్రాయంగా మద్దతు ఇస్తుందన్న ఆమె.. ప్రభుత్వ ఉద్యోగాల్లో మహిళలకు 50 శాతం రిజర్వేషన్ ఇవ్వాలని కోరారు.

అటు.. కాంగ్రెస్ పార్టీ ఈ మహిళా రిజర్వేషన్ బిల్లు తమదేనని వాదిస్తోంది. ఈ బిల్లును 2010లో మన్మోహన్ సింగ్ ప్రభుత్వం తొలిసారిగా ప్రవేశపెట్టిందని, 2019లో ప్రధాని మోదీకి రాహుల్ గాంధీ రాసిన లేఖలోనూ ఈ అంశాన్ని ప్రస్తావించారని కాంగ్రెస్ ఎత్తిచూపింది. కాంగ్రెస్ మాజీ అధ్యక్షురాలు సోనియాగాంధీ సైతం ఈ బిల్లు తమదేనని విలేకరులతో పేర్కొన్నారు. మరోవైపు.. ఈ బిల్లుని ఎన్నికల జుమ్లాగా కాంగ్రెస్ సీనియర్ నాయకుడు జైరాం రమేష్ దుయ్యబట్టారు. ఈ బిల్లు ఆశ చూపి.. కోట్లాదిమంది మహిళలు, అమ్మాయిల ఆశలపై నీళ్లు చల్లుతున్నారని విమర్శించారు. కాంగ్రెస్ అధ్యక్షుడు మల్లికార్జున ఖర్గే సైతం ఒక ముఖ్యమైన అంశాన్ని ప్రస్తావించారు. మహిళల హక్కులను పెంపొందించడం కోసం.. విద్యావంతులైన మహిళా అభ్యర్థులను ఎన్నుకోవాలని పార్టీలను కోరారు.