US Open 2023: ముగిసిన భారత్ పోరాటం.. సెమీస్‌లో లక్ష్యసేన్ ఓటమి

యూఎస్ ఓపెన్ 2023లో భారత్ పోరాటం ముగిసింది. పురుషుల సింగిల్స్ సెమీ ఫైనల్ పోరులో చైనాకు చెందిన లి షి ఫెంగ్ చేతిలో లక్ష్య సేన్ ఓటమిపాలయ్యాడు. చివరి వరకు హోరాహోరీగా సాగిన ఈ పోరులో 17-21, 24-22, 17-21 తో లక్ష్యసేన్ ఓడిపోయాడు. 12వ ర్యాంక్‌లో ఉన్న లక్ష్యసేన్, 7వ ర్యాంకులో ఉన్న లి షి ఫెంగ్ నువ్వా నేనా అన్నట్టుగా పోరాడడంతో గంట 16 నిమిషాల పాటు ఈ మ్యాచ్ సాగింది. నిజానికి ఈ మ్యాచ్‌కు ముందు వరకు లి షి ఫెంగ్‌పై లక్ష్యసేన్‌కు మెరుగైన రికార్డు ఉంది. ఇద్దరు తలపడిన హెడ్ టూ హెడ్ మ్యాచ్‌ల్లో లక్ష్యసేన్ 5 గెలవగా.. లి షి ఫెంగ్ 2 గెలిచాడు.

ఆరంభం నుంచి హోరాహారీ సాగిన ఈ మ్యాచ్‌ మొదటి సెట్‌లో లక్ష్యసేన్, లి షి ఫెంగ్ నువ్వా నేనా అన్నట్టుగా తలపడ్డారు. కానీ లి షి ఫెంగ్‌దే పైయి అయ్యింది. దీంతో 17-21తో లక్ష్యసేన్ మొదటి సెట్‌ను కోల్పోయాడు. ఆ తర్వాత కీలకమైన రెండో సెట్‌లోనూ ఉత్కంఠ తప్పలేదు. దీంతో ఇద్దరు 22-22తో సమంగా నిలిచారు. ఈ సమయంలో వరుసగా రెండు పాయింట్లు సాధించిన లక్ష్యసేన్ రెండో సెట్‌ను కైవసం చేసుకున్నాడు. దీంతో మ్యాచ్ ఫలితం కోసం మూడో సెట్‌ను నిర్వహించక తప్పలేదు. అయితే మూడో సెట్ సైతం హోరాహోరీగా సాగగా లక్ష్యసేన్ 17-21తో ఓటమి పాలయ్యాడు. దీంతో సెట్‌తో మ్యాచ్‌ను కోల్పోవల్సి వచ్చింది. కీలక సమయంలో చేసిన లక్ష్యసేన్ చేసిన తప్పులు లీ షి ఫెంగ్‌కు వరంగా మారాయి. ఈ విజయంతో లీ షి ఫెంగ్ ఫైనల్‌లో అడుగుపెట్టగా లక్ష్యసేన్ ఇంటిముఖం పట్టాడు. ఇక యూఎస్ ఓపెన్‌లో పీవీ సింధు క్వార్టర్ ఫైనల్‌లోనే ఇంటిదారి పట్టిన సంగతి తెలిసిందే. కాగా యూఎస్ ఓపెన్‌కు ముందు జరిగిన కెనడా ఓపెన్ 2023 ఫైనల్ పోరులో లీ షి ఫెంగ్‌ను 21-18, 22-20తో ఓడించి లక్ష్యసేన్ టైటిల్ గెలుచుకున్నాడు. అయితే కెనడా ఓపెన్ ఓటమికి తాజాగా లీ షి ఫెంగ్ ప్రతీకారం తీర్చుకున్నట్టైంది.