మిణుగురుల ప్రపంచంలోకి...

రాత్రిళ్లు ఆకాశంలోని నక్షత్రాలు భూమి మీద వాలాయా అన్నట్టుగా ఉంటుంది మెరిసే మిణుగురుల్ని చూస్తే. మనదేశంలో వీటిని అంతగా పట్టించుకోం గానీ... ఫిలిప్పీన్స్‌, జపాన్‌ లాంటి దేశాల్లో ఏకంగా మిణుగురు యాత్రలే నిర్వహిస్తున్నారు. వర్షాకాలంలో తప్ప మిగతా కాలాల్లో ఈ ‘ఫైర్‌ఫ్లైస్‌ టూర్స్‌’ అందుబాటులో ఉన్నాయి. ఫిలిప్పీన్స్‌లోని బోహో, పాలవాన్‌, సిక్విజార్‌ ద్వీపాలు మిణుగురుల బోట్‌ టూర్లకు ప్రసిద్ధి.

రాత్రి వేళల్లో అక్కడి నదుల్లో పడవ విహారం ఓ అబ్బురం అయితే, చెట్లపై మిలమిలా మెరిసే వేలాది మిణుగురులను చూడటానికి రెండు కళ్లు చాలవు. ఈ ఫైర్‌ఫ్లైస్‌ టూర్లకు సరైన సీజన్‌ మార్చి నుంచి మే. ఈ సమయంలో అక్కడ టూరిస్టుల హడావుడి కాస్త ఎక్కువే. పారిశ్రామిక కాలుష్యం కారణంగా రానురాను మిణుగురుల మనుగడ ప్రశ్నార్థకంగా మారుతోంది. అందుకే కాబోలు... వాటిని చూసేందుకు పర్యాటకులు ఎగబడుతున్నారు.