IPL 2025: కోల్‌కతా చేరుకున్న శ్రేయా ఘోషల్, దిశా పటానీ.. ఐపీఎల్ వేడుకలు షురూ

అతి పెద్ద క్రికెట్ సమరం అయిన ఐపీఎల్ 2025 (IPL 2025) మరికొద్ది గంటల్లో ప్రారంభం కాబోతోంది. కోల్‌కతా (Kolkakta)లోని ఈడెన్ గార్డెన్స్‌లో జరగబోయే తాజా సీజన్ తొలి మ్యాచ్‌లో కోల్‌కతా నైట్ రైడర్స్, బెంగళూరు రాయల్ ఛాలెంజర్స్ జట్లు తలపడబోతున్నాయి. ఆ మ్యాచ్ కంటే ముందు ఐపీఎల్ 2025 ప్రారంభోత్సవ వేడుకలు అట్టహాసంగా జరగబోతున్నాయి. ప్రముఖ గాయని శ్రేయా ఘోషల్ (Shreya Ghoshal) తన గాత్రంతో అభిమానులను అలరించబోతోంది. శ్రేయాతో పాటు ప్రముఖ సింగర్లు అర్జిత్ సింగ్, కరణ్ ఔజ్లా కూడా గళం కలపనున్నారు.

ఇక, బాలీవుడ్ హాట్ హీరోయిన్ దిశా పటానీ (Disha Patani) కూడా ఈడెన్ గార్డెన్స్‌లో తన డ్యాన్స్ ప్రదర్శనతో అదరగొట్టబోతోంది. ఈ వేడుకల కోసం ఇప్పటికే శ్రేయా ఘోషల్, దిశా పటానీ కోల్‌కతా చేరుకున్నారు. వీరికి బెంగాల్ అభిమానులు ఘన స్వాగతం పలికారు. వీరి పెర్ఫార్మెన్స్ కోసం అందరూ ఆసక్తిగా ఎదురుచూస్తున్నారు. అయితే ఈ వేడులకు కాస్త తక్కువ సమయం మాత్రమే కేటాయించడం కొంత నిరాశ కలిగించే విషయమే. మ్యాచ్‌కు ముందు 35 నిమిషాల పాటు మాత్రమే ఈ ప్రదర్శన జరగబోతోంది. వీరి ప్రదర్శన అనంతరం మ్యాచ్ ప్రారంభమవుతుంది.

ఈ మ్యాచ్‌కు సంబంధించి బెంగాల్ క్రికెట్ అసోషియేషన్ గొప్పగా ఏర్పాట్లు చేసింది. ఇప్పటికే మ్యాచ్‌కు సంబంధించిన టిక్కెట్లన్నీ అమ్ముడుపోయాయి. ఈ వేడుకలను, మ్యాచ్‌ను చూసేందుకు 60 వేల మందికి పైగా ప్రేక్షకులు స్టేడియంకు రాబోతున్నారు. కొన్ని కోట్ల మంది అభిమానులు టీవీల ముందు కూర్చుని ఆరంభ వేడుకలను, మ్యాచ్‌ను వీక్షించబోతున్నారు. స్టార్ స్పోర్ట్స్ ఛానెళ్లలోనూ, జియో హాట్‌స్టార్‌లోనూ ఐపీఎల్ మ్యాచ్‌లు ప్రసారం కాబోతున్నాయి.

ఇవి కూడా చదవండి..

IPL 2025: బిగ్‌ స్క్రీన్‌పై ఐపీఎల్.. బీసీసీఐతో పీవీఆర్ ఒప్పందం..

IPL 2025, KKR vs RCB: ఈడెన్‌లో ఇప్పటివరకు ఎవరిది పైచేయి.. టాస్ గెలిస్తే ఏం చేయాలి..

మరిన్ని క్రీడా, తెలుగు వార్తల కోసం క్లిక్ చేయండి