Bandla Ganesh: చంద్రబాబును కాపాడుకోవాల్సిన బాధ్యత ప్రతి ఒక్కరిది

హైదరాబాద్: తెలుగుదేశంపార్టీ జాతీయ అధ్యక్షుడు, మాజీ సీఎం చంద్రబాబు (Chandrababu) తెలుగు జాతి సంపదని.. ఆయన్ని కాపాడుకోవాల్సిన బాధ్యత ప్రతి ఒక్కరిదని సినీ నిర్మాత, నటుడు బండ్ల గణేష్ (Bandla Ganesh) అన్నారు. ఈ సందర్భంగా మంగళవారం ఆయన ఏబీఎన్ ఆంధ్రజ్యోతి (ABN Andhrajyothy)తో మాట్లాడుతూ చంద్రబాబు పేరు వాడుకొని ఎంతోమంది లబ్ధి పొందారని, ఎంతోమంది జీవితాలు నిలబెట్టారని అన్నారు. బాబు అరెస్ట్ తనను ఎంతగానో బాధించిందని, ఈసారి తన ఇంట్లో వినాయక చవితి వేడుకలు కూడా జరుపుకోలేదని చెప్పారు.

పార్కుల ముందు, రోడ్లపై కాకుండా.. సొంతూళ్లకు వెళ్లి బొడ్రాయి ముందు కూర్చుని అందరూ ధర్నాలు చేయాలని బండ్ల గణేష్ పిలుపిచ్చారు. ఐటీ ఉద్యోగులకు చీము నెత్తురు ఉంటే నెలరోజుల పాటు ఉద్యోగాలు మానేసి సొంతుళ్ళకు వెళ్ళి ధర్నాలు చేయాలన్నారు. చంపుతారా.. చంపేయమని చెప్పండని.. చంద్రబాబు రాజమండ్రి జైల్లో మగ్గుతుంటే అన్నం కూడా తినబుద్ధి కావట్లేదని.. వచ్చే ఎన్నికల్లో చంద్రబాబు గెలుస్తారని.. ముఖ్యమంత్రి అవుతారని బండ్ల గణేష్ ఆశాభావం వ్యక్తం చేశారు.