AP Politics: ‘పెడన’ టికెట్ కృష్ణ ప్రసాద్ కే.. బాబుతో భేటీ తర్వాత మారిన సీన్!

అమరావతి, ఫిబ్రవరి 7: ఏపీలో ఎన్నికలు సమీపిస్తున్న వేళ అధికారంలోకి రావడమే లక్ష్యంగా టీడీపీ - జనసేన కూటమి కార్యాచరణను రూపొందిస్తోంది. అయితే టికెట్‌ల విషయంలో మాత్రం ఇరు పార్టీల అభ్యర్థుల్లో కాస్త భయం కనపడుతున్నట్లు సమాచారం. పొత్తులో భాగంగా రెండు పార్టీల్లో ఏ పార్టీ అభ్యర్థికి టికెట్ దక్కుతుందో అనే టెన్షన్ ప్రతీఒక్కరిలో ఉంది. సీట్ల సర్దుబాటుపై ఇరు పార్టీల అధినేతలు ఎలాంటి నిర్ణయం తీసుకుంటారనే ఉత్కంఠ టీడీపీ - జనసేన పార్టీ నేతల్లో నెలకొంది.

టికెట్‌పై హామీ!

ఇలాంటి పరిస్థితినే ప్రస్తుతం పెడన టీడీపీ ఇంచార్జ్ కాగిత కృష్ణ ప్రసాద్ ఎదుర్కొంటున్నారు. పొత్తులో భాగంగా పెడన జనసేనకు పోతుందనే అనుమానం టీడీపీ నేతలను టెన్షన్‌కు గురిచేస్తున్నట్లు తెలుస్తోంది. ఈ క్రమంలో బుధవారం హుటాహుటిన ఉండవల్లిలోని చంద్రబాబు నివాసానికి చేరుకున్న కాగిత కృష్ణప్రసాద్... అధినేతతో భేటీ అయ్యారు. కృష్ణ ప్రసాద్ అనుచరులు సైతం చంద్రబాబు నివాసం వద్దకు చేరుకున్నారు. అయితే చంద్రబాబుతో భేటీ అనంతరం తన అనుచరులతో కాగిత కృష్ణ ప్రసాద్ కలిశారు. టికెట్‌పై చంద్రబాబు హామీ ఇచ్చారని, జాగ్రత్తగా పని చేసుకోవాలని సూచించారని అనుచరులకు కృష్ణ ప్రసాద్ తెలిపారు.

అనుచరుల ఆనందం..

కాగా.. ఇటీవల టీడీపీ అధినేత చంద్రబాబు, జనసేన అధినేత పవన్ కళ్యాణ్ రెండు సార్లు భేటీ అయిన విషయం తెలిసిందే. ఈ క్రమంలో పెడన టికెట్ తనకే ఇవ్వాలని పవన్ పట్టుబట్టినట్లు సమాచారం. ఈ నేపథ్యంలోనే చంద్రబాబుతో కృష్ణప్రసాద్ భేటీ అవగా.. పెడన టికెట్‌పై హామీ ఇచ్చారని కృష్ణప్రసాద్ అనుచరులు ఆనందం వ్యక్తం చేస్తున్నారు.

మరిన్ని ఏపీ వార్తల కోసం ఇక్కడ క్లిక్ చేయండి...