Hyderabad: పోసాని అరెస్ట్‌

• హైదరాబాద్‌లో అదుపులోకి తీసుకున్న ఆంధ్రప్రదేశ్‌ పోలీసులు

• జనసేన నేత ఫిర్యాదుపై పోసాని మీద కేసు

• ఏపీ వ్యాప్తంగా ఇప్పటికే పదికిపైగా కేసులు

• వైసీపీ అధికారంలో ఉండగా నోటిదురుసు

• అప్పట్లో ఫిర్యాదులపై స్పందించని పోలీసులు

• అరెస్టు వేళ పోలీసులతో పోసాని వాగ్వాదం

• నోటీసులు ఇచ్చి అరెస్టు చేసిన పోలీసులు

• నేడు రాజంపేట కోర్టులో పోసాని హాజరు!

అమరావతి/హైదరాబాద్‌/రాయచోటి, ఫిబ్రవరి 26 (ఆంధ్రజ్యోతి): వైసీపీ అధికారంలో ఉండగా... టీడీపీ, జనసేన అగ్రనేతలపై పిచ్చిపిచ్చిగా రెచ్చిపోయి, అడ్డూ అదుపూ లేకుండా నోరు పారేసుకున్న సినీ నటుడు పోసాని కృష్ణ మురళిని పోలీసులు అరెస్టు చేశారు. అన్నమయ్య జిల్లా ఓబుళవారిపల్లె పోలీసు స్టేషన్‌లో నమోదైన కేసులో ఆయనను అదుపులోకి తీసుకున్నారు. బుధవారం రాత్రి హైదరాబాద్‌లోని మైహోం భూజా అపార్ట్‌మెంట్‌లో ఉన్న పోసాని కృష్ణ మురళి నివాసానికి వెళ్లి... నోటీసులు అందించి, అరెస్టు చేశారు. అన్నమయ్య జిల్లా సంబేపల్లె ఎస్‌ఐ భక్తవత్సలం ఆధ్వర్యంలో నలుగురు పోలీసులు హైదరాబాద్‌లోని రాయదుర్గం పోలీసులను కలిసి... పోసాని కృష్ణ మురళిపై నమోదైన కేసు వివరాలను అందించారు. ఆయన అరెస్టుకు ఎస్కార్ట్‌ కల్పించాలని కోరారు. దీంతో... రాయదుర్గం ఠాణా నుంచి ఒక ఎస్‌ఐ, ఒక కానిస్టేబుల్‌ ఏపీ పోలీసులకు తోడుగా వెళ్లారు. రాత్రి 8.45 గంటల సమయంలో మైహోం భూజాలోని పోసాని నివాసానికి వెళ్లి, ఆయనను అరెస్టు చేశారు. ఆయనను గురువారం రాజంపేట కోర్టులో హాజరుపరిచే అవకాశముంది. అరెస్టు సమయంలో పోసాని పోలీసులకు సహకరించకుండా వాగ్వాదానికి దిగారు. ‘నోటీసులు తీసుకోను. అరెస్టు చేసుకోండి. అసలు మీరెవరు? ఎలా మా ఇంటికి వస్తారు?’ అని ప్రశ్నించడంతో... తాము అన్నమయ్య జిల్లా పోలీసులమని ఎస్‌ఐ భక్తవత్సలం తెలిపారు. అరెస్టు చేస్తున్నాం... సహకరించండి అని కోరారు. ‘‘ముందు నాకు నోటీసు ఇవ్వండి. నేను ఆస్పత్రికి వెళ్లి ట్రీట్‌మెంట్‌ చేయించుకుని... తర్వాత మీ దగ్గరికి వస్తాను’’ అని పోలీసులకు సూచించారు. అలా కుదరదని, అరెస్టుకు సహకరించకపోతే తమ డ్యూటీ తాము చేయాల్సి వస్తుందని పోలీసులు స్పష్టం చేశారు. ‘నాకు ఆరోగ్యం బాగలేదు... ఆపరేషన్‌ చేయించుకున్నా. పేషంట్‌ను కూడా పట్టించుకోరా’ అని మళ్లీ పోసాని ఆగ్రహించారు.

పోసాని సతీమణికి నోటీసు ఇచ్చేందుకు పోలీసులు ప్రయత్నించారు. ‘సర్‌ను అరెస్టు చేస్తున్నాం, నోటీసు తీసుకోండి మేడమ్‌’ అని కోరడంతో... ‘తీసుకోవద్దు... తీసుకోవద్దు’ అని పోసాని ఆమెను ఆదేశించారు. ‘నోటీసు తీసుకోండి సార్‌’ అని పోలీసు అధికారి పదేపదే కోరినా... ‘నోటీసు తీసుకునేదిలేదు. అరెస్టు చేసుకోండి’ అని విసురుగా బదులిచ్చారు. ‘ఆడవాళ్ల మీద రౌడీయిజం చేయొద్దు’ అని పోలీసులను హెచ్చరించారు. ‘మేం రౌడీయిజం చేయడంలేదు. నోటీసు ఇస్తున్నాం’ అని ఎస్‌ఐ బదులిచ్చారు. ‘నేను మాత్రలు వేసుకోవాలి. అన్నం తింటా’ అన్నారు. ఆయన వేసుకోవాల్సిన మందులు ఇవ్వాలని పోలీసులు సూచించగా... ‘ఏ మాత్ర ఎప్పుడు వేసుకోవాలో ఆయనకు తెలియదు. అన్నీ నేనే ఇస్తా’ అని ఆయన సతీమణి చెప్పారు. అన్ని విషయాలు తాము దగ్గరుండి జాగ్రత్తగా చూసుకుంటామని పోలీసులు హామీ ఇచ్చారు. దుస్తులు మార్చుకుని రావాలని పోసానిని కోరారు. ఆయన కొంత సమయం తీసుకుని దుస్తులు మార్చుకుని, పోలీసులతో వచ్చారు. 2019లో వైసీపీ అధికారంలోకి రాకముందు నుంచే పోసాని టీడీపీ, జనసేన అగ్రనేతలపై అడ్డగోలుగా మాట్లాడటం మొదలుపెట్టారు. చంద్రబాబు, పవన్‌ కల్యాణ్‌లపై శ్రుతిమించి వ్యక్తిగత విమర్శలకు దిగేవారు. ఇక... వైసీపీ అధికారంలోకి వచ్చాక ఆయన మరింత రెచ్చిపోయారు. చంద్రబాబు, పవన్‌ కల్యాణ్‌లను బూతులు తిట్టడమే పనిగా పెట్టుకున్నారు. దీనికి ప్రతిఫలంగా జగన్‌ ఆయనకు ఏపీ ఫిల్మ్‌డెవల్‌పమెంట్‌ కార్పొరేషన్‌ (ఏపీఎ్‌ఫడీసీ) చైర్మన్‌ పదవి కట్టబెట్టారు. ప్రెస్‌మీట్లు, టీవీ డిబేట్లు, సోషల్‌ మీడియా వేదికలపై టీడీపీ, జనసేన నేతలను పోసాని అసభ్య పదజాలంతో తిట్టిన సందర్భాలు ఎన్నో! పత్రికల్లో ప్రచురించలేని భాష కూడా వాడారు. పోసాని వ్యాఖ్యలపై కడుపుమండిన టీడీపీ, జనసేన కార్యకర్తలు అప్పట్లో ఫిర్యాదులు చేసినా పోలీసులు పట్టించుకోలేదు. కూటమి ప్రభుత్వం వచ్చాక పోసాని వ్యాఖ్యలపై చర్యలు తీసుకోవాలని కోరుతూ గుంటూరు, విజయవాడ, నర్సారావుపేట, అన్నమయ్య, అనంతపురం, బాపట్ల, తూర్పు గోదావరి, పశ్చిమ గోదావరి తదితర ప్రాంతాల్లో ఫిర్యాదులు వచ్చాయి. ఆయనపై రాష్ట్రవ్యాప్తంగా పదికిపైగా కేసులు నమోదయ్యాయి.

రంగంలోకి అన్నమయ్య జిల్లా పోలీసులు

అన్నమయ్య జిల్లా రైల్వేకోడూరు నియోజకవర్గం ఓబులవారిపల్లె పోలీ్‌సస్టేషన్‌లో ఈనెల 24వ తేదీ మణి అనే జనసేన నాయకుడు పోసానిపై ఫిర్యాదు చేశారు. కులాల పేరుతో దూషించడం, ప్రజల్లో వర్గ విభేదాలు సృష్టించడం వంటి అభియోగాలతో భారత న్యాయ సంహితలోని సెక్షన్‌ 196, 353 (2), 111 రెడ్‌విత్‌ 3(5) కింద కేసు (క్రైమ్‌ నంబర్‌ 65/2025) నమోదు చేశారు. పోసాని మాట్లాడిన మాటల వీడియో, ఆడియో టేపులను పోలీసులు పరిశీలించారు. ఇదే కేసులో ఆయనను బుధవారం రాత్రి అరెస్టు చేశారు.

Read Also : టన్నెల్‌లో తాజా పరిస్థితి ఇది.. మంత్రి ఉత్తమ్ కుమార్ రెడ్డి ఏమన్నారంటే..

ఇదెక్కడి వింత రైలు.. రోడ్డు మీద నడస్తున్న ఈ విచిత్రాన్ని చూస్తే షాకవ్వాల్సిందే..

తమిళనాడు సీఎంకు అమిత్ షా కౌంటర్.. 5 లక్షల కోట్లు ఇచ్చామని వెల్లడి