Rishi Sunak: బ్రిటన్‌ ప్రధానికి భారీ జరిమానా..!

లండన్: బ్రిటన్‌ ప్రధాని రుషి సునాక్‌ (Rishi Sunak) ట్రాఫిక్ రూల్స్ అతిక్రమించినందుకు అక్కడి పోలీసులు భారీ జరిమానా విధించారు. కారులో ప్రయాణిస్తూ సీటుబెల్ట్‌ ధరించనందుకు 100 పౌండ్లు (రూ.10వేలు) ఫైన్ విధించినట్లు లాంక్‌షైర్ పోలీసులు (Lancashire Police) వెల్లడించారు. కాగా, తన ప్రభుత్వ కార్యకలాపాలపై ఓ సోషల్‌ మీడియా వీడియో చిత్రీకరణ సమయంలో ఆయన కారులో కాసేపు సీటుబెల్ట్‌ తొలగించారు. ఈ వీడియో కాస్తా సోషల్ మీడియాలో వైరల్ కావడంతో వివాదం రాజుకుంది. దేశ ప్రధాని ఇలా ట్రాఫిక్ నిబంధనలు ఉల్లంఘించడం ఏంటని ప్రతిపక్షాల విమర్శలు సైతం ఎదుర్కొన్నారు. దీంతో రిషి సునాక్ క్షమాపణలు కూడా చెప్పారు. ఇక బ్రిటన్ చట్టాల ప్రకారం కారులో ప్రయాణించే సమయంలో ప్రతి ఒక్కరూ తప్పనిసరిగా సీటు బెల్టు ధరించాల్సి ఉంటుంది. అత్యవసర వైద్యం పొందాల్సిన వ్యక్తి మినహా ప్రతీఒక్కరూ సీటు బెల్టు వేసుకోవాల్సిందే. లేనిపక్షంలో 100 పౌండ్ల జరిమానా చెల్లించాలి.