Bhatti Vikramarka: ఇండియా కూటమి రాగానే రైతు రుణమాఫీ

• కూటమికి ఆదరణ చూసి మోదీలో ఆందోళన

• పంజాబ్‌ ఎన్నికల ప్రచారంలో భట్టి

హైదరాబాద్‌, మే 27 (ఆంధ్రజ్యోతి) : కేంద్రంలో ఇండియా కూటమి అధికారంలోకి రాగానే రైతులకు రుణమాఫీ చేస్తామని డిప్యూటీ సీఎం మల్లు భట్టి విక్రమార్క హామీ ఇచ్చారు. పంజాబ్‌ రాష్ట్రం ఫరీద్‌కోట్‌ లోక్‌సభ నియోజకవర్గం పరిధిలోని కోటక్‌పుర అసెంబ్లీ నియోజకవర్గంలో ఎన్నికల ప్రచారంలో ఆయన మాట్లాడుతూ... అధికారం చేపట్టగానే ఓ కమిషన్‌ ఏర్పాటు చేస్తామని, రైతులకు రుణమాఫీ అవసరమైన ప్రతిసారీ ఆ కమిషన్‌ ప్రభుత్వానికి తెలియజేస్తుందన్నారు. కేంద్ర ప్రభుత్వాన్ని బిలియనీర్లు అయిన అదానీ, అంబానీలు నడుపుతున్నారన్నారు,

ప్రధాని అదానీ గ్రూపులకు విమానాశ్రయాలు, రైల్వే ేస్టషన్లు విక్రయించి తన పరువు పోగొట్టుకున్నారని, ఈ దేశం పరువు తీశారని ఆగ్రహం వ్యక్తం చేశారు. దేశంలో పెరిగిపోయిన నిరుద్యోగం, ద్రవ్యోల్బణం, అవినీతి పరిస్థితులకు బీజేపీ తగిన మూల్యం చెల్లించాల్సి ఉంటుందన్నారు. ఈ ఎన్నికల్లో దేశ ప్రజలు పెద్ద మార్పు తీసుకురాబోతున్నారని, దీంతో ఇండియా కూటమికి వస్తున్న ఆదరణ చూసి మోదీ ఆందోళన చెందుతున్నారన్నారు. అందుకే విపక్షాలపై దిగజారుడు ఆరోపణలు చేస్తున్నారని విమర్శించారు.