Dengue Fever: డెంగీ లక్షణాలతో బాలింత, పసికందు మృతి

ఎల్లారెడ్డిపేట, ఆగస్టు 14: డెంగీ లక్షణాలతో నవజాత శిశువుతోపాటు ఓ బాలింత మృతి చెందింది. ఈ ఘటన రాజన్న సిరిసిల్ల జిల్లా ఎల్లారెడ్డిపేట మండలం నారాయణపూర్‌లో జరిగింది. గ్రామంలోని తాళ్లపల్లి శిరీష- చంద్రం దంపతులకు ఇద్దరు కొడుకులున్నారు. శిరీష మూడోసారి గర్భం దాచ్చింది. 4 రోజుల క్రితం ఆమెకు పురిటినొప్పులు రావడంతో కుటుంబసభ్యులు ముస్తాబాద్‌లోని ఓ ప్రైవేటు ఆసుపత్రికి తరలించారు.

ఆమెకు తీవ్రమైన జ్వరం ఉందని ప్రభుత్వాసుపత్రికి తీసుకెళ్లాలని కుటుంబసభ్యులకు వైద్యులు తెలిపారు. ఆమెను సిద్దిపేటలోని ప్రభుత్వాసుపత్రికి తీసుకెళ్లారు. వైద్య పరీక్షలు నిర్వహించిన వైద్యులు శిరీషకు డెంగీ లక్షణాలు ఉన్నట్లు నిర్ధారించారు.ఆమెకు శస్త్రచికిత్స చేయడంతో ఆడ బిడ్డకు జన్మనిచ్చింది. ఈ క్రమంలో వారి ఆరోగ్య పరిస్థితి విషమించి తల్లీబిడ్డలు మరణించారు.