Chandrababu: వైసీపీకి ఇవే చివరి ఎన్నికలు
ABN , First Publish Date - 2022-11-03T18:38:23+05:30 IST
ఏపీ సీఎం జగన్‌మోహన్ రెడ్డిపై ఆంధ్రప్రదేశ్ మాజీ ముఖ్యమంత్రి నారా చంద్రబాబునాయుడు విమర్శలు గుప్పించారు.
అమరావతి: ఏపీ సీఎం జగన్‌మోహన్ రెడ్డిపై ఆంధ్రప్రదేశ్ మాజీ ముఖ్యమంత్రి నారా చంద్రబాబునాయుడు విమర్శలు గుప్పించారు. జగన్‌రెడ్డి బటన్ నొక్కి ఇచ్చే డబ్బులకంటే నొక్కేసే డబ్బులే ఎక్కువ అని, వైసీపీకి ఇవే చివరి ఎన్నికలు అవుతాయని చంద్రబాబు అన్నారు. సీఎం జగన్‌రెడ్డి రంజాన్ తోఫా కూడా ఇవ్వట్లేదని, దుల్హన్ పథకాన్ని ఆంక్షల పథకంగా మార్చి భారీగా కోత పెట్టారని విమర్శించారు. ముస్లింల అభ్యున్నతికి పాటుపడింది టీడీపీ మాత్రమే అని చంద్రబాబు అన్నారు.
టీడీపీ మైనార్టీ విభాగం రాష్ట్ర కమిటీ సభ్యులతో ఏపీ మాజీ సీఎం చంద్రబాబునాయుడు ప్రమాణస్వీకారం చేయించారు. ఏపీలో మార్పు మొదలైంది.. అది ముస్లిం మైనార్టీల్లో స్పష్టంగా కనిపిస్తోందని, ఈ మార్పు పెను తుపాన్‌గా మారి వైసీపీ కొట్టుకుపోతుందని చంద్రబాబు జోస్యం చెప్పారు. ముస్లిం మైనార్టీల అభ్యున్నతికి జగన్‌రెడ్డి ఏం చేశారో చెప్పాలి? అని చంద్రబాబు ప్రశ్నించారు. వక్ఫ్ బోర్డు భూములు ఆక్రమించే కబ్జాదారులు చెలరేగిపోతున్నారని, ముస్లిం మైనార్టీల ఆస్తులు దోచుకునేందుకూ వైసీపీ నేతలు వెనకాడరని చంద్రబాబు ఆరోపించారు.
