Renuka chowdhury: ఆర్టీసీ బస్సులో ప్రయాణించిన రేణుకా చౌదరి

హైదరాబాద్: కేంద్ర మాజీ మంత్రి రేణుకా చౌదరి (Former Central Minister Renuka Chowdary) ఆర్టీసీ బస్సులో ప్రయాణించారు. సోమవారం గాంధీ భవన్ నుంచి మహిళలతో కలిసి రేణుకాచౌదరి బస్సులో ప్రయాణించారు. ఈ సందర్భంగా ఉచిత బస్సు పథకాన్ని కేంద్రమాజీ మంత్రి మహిళలకు వివరించారు. అనంతరం రేణుకాచౌదరి ఏబీఎన్‌తో మాట్లాడుతూ.. బీఆర్ఎస్ వాళ్ళని చూస్తే జాలి వేస్తోందన్నారు. బీఆర్ఎస్ నేతలు ఇక రెస్ట్ తీసుకోవాలని ఎద్దేవా చేశారు. బీఆర్ఎస్ వాళ్ళకి రాని ఆలోచనలు తమకు వస్తున్నాయని కుళ్లుకొంటున్నారన్నారు. ఉచిత బస్సు వల్ల మహిళలకు, విద్యార్థులకు ఎంతో ఉపయోగమన్నారు. ప్రభుత్వం వచ్చి రెండు రోజులు కాకముందే విమర్శలు మొదలు పెడుతున్నారని మండిపడ్డారు. ఇచ్చిన వాగ్దానాలను కాంగ్రెస్ నెరవేరుస్తుందని స్పష్టం చేశారు. ఉచితాలు ప్రజల సంక్షేమం కోసమని.. దాని వల్ల సోమరి పోతులు అవ్వడం ఉండదని రేణుకాచౌదరి వెల్లడించారు.