KTR Birthday: కేటీఆర్‌కు సీఎం జన్మదిన శుభాకాంక్షలు..
ABN , Publish Date - Jul 25 , 2024 | 04:07 AM
బీఆర్‌ఎస్‌ కార్యనిర్వాహక అధ్యక్షుడు, ఎమ్మెల్యే కేటీఆర్‌ పుట్టిన రోజు వేడుకలు బుధవారం ఘనంగా జరిగాయి. రాష్ట్ర ముఖ్యమంత్రి రేవంత్‌ రెడ్డి ఆయనకు లేఖ ద్వారా జన్మదిన శుభాకాంక్షలు తెలియజేశారు.
స్టేట్‌హోం విద్యార్థినులకు సొంత నిధులతో ల్యాప్‌ట్యాప్‌లు పంపిణీ చేసిన కేటీఆర్‌
హైదరాబాద్‌, హైదరాబాద్‌ సిటీ, జూలై 24 (ఆంధ్రజ్యోతి): బీఆర్‌ఎస్‌ కార్యనిర్వాహక అధ్యక్షుడు, ఎమ్మెల్యే కేటీఆర్‌ పుట్టిన రోజు వేడుకలు బుధవారం ఘనంగా జరిగాయి. రాష్ట్ర ముఖ్యమంత్రి రేవంత్‌ రెడ్డి ఆయనకు లేఖ ద్వారా జన్మదిన శుభాకాంక్షలు తెలియజేశారు. ప్రజాసేవలో ఉంటూ రాష్ట్రాభివృద్ధికి పాటుపడేలా భగవంతుడు కేటీఆర్‌కు ఆయురారోగ్యాలు ప్రసాదించాలని సీఎం ఆకాంక్షించారు. మాజీ మంత్రి హరీశ్‌రావు సహా బీఆర్‌ఎస్‌ ఎమ్మెల్యేలు కేటీఆర్‌ను కలిసి శుభాకాంక్షలు చెప్పారు. అలాగే, హైదరాబాద్‌, నందినగర్‌లోని కేసీఆర్‌ నివాసంలో జరిగిన వేడుకల్లో కేటీఆర్‌... తన తల్లిదండ్రుల ఆశీర్వాదం తీసుకున్నారు.
ఈ సందర్భంగా తండ్రి కేసీఆర్‌కు మిఠాయి తినిపించిన అనంతరం కేటీఆర్‌ ఆయన్ను ఆలింగనం చేసుకున్నారు. బీఆర్‌ఎస్‌ పార్టీ కార్యాలయం తెలంగాణ భవన్‌లో పార్టీ శ్రేణులు భారీ కేక్‌ కట్‌ చేయడంతోపాటు రక్తదాన శిబిరం నిర్వహించాయి. ఇక, కేటీఆర్‌ తన జన్మదినం సందర్భంగా గిఫ్ట్‌ ఏ స్మైల్‌లో భాగంగా స్టేట్‌ హోంలోని 100 మంది విద్యార్థినులకు తన సొంత ఖర్చుతో సమకూర్చిన ల్యాప్‌ట్యా్‌పలు పంపిణీ చేశారు. హైదరాబాద్‌లోని ఓ హోటల్‌లో జరిగిన ఈ కార్యక్రమంలో కుటుంబసభ్యులతో కలిసి పాల్గొన్న కేటీఆర్‌... విద్యార్థినులతో కలిసి కేక్‌ కట్‌ చేశారు. అలాగే, ఇటీవల ఆత్మహత్య చేసుకున్న 13 మంది చేనత కార్మికుల కుటుంబాలకు సాయం చేస్తానని ప్రకటించారు.
