Viral Video: పెంపుడు కుక్కలతో పుట్టిన రోజు వేడుకలు జరుపుకున్న ధోనీ

టీమిండియా మాజీ కెప్టెన్ మహేంద్ర సింగ్ ధోనీ(MS Dhoni) ఈ సారి తన పుట్టిన రోజు వేడుకలను వినూత్నంగా జరుపుకున్నాడు. ఎవరూ ఊహించని విధంగా తన పెంపుడు కుక్కలతో ధోనీ పుట్టిన రోజు వేడుకలను జరుపుకోవడం అందరినీ ఆశ్చర్యపరిచింది. ఈ వేడుకలకు సంబంధించిన వీడియోను ధోనీ తన ఇన్‌స్టాగ్రామ్ (Instagram) ఖాతాలో పోస్ట్ చేయడంతో క్షణాల్లోనే వైరల్‌గా మారింది. ధోనీ ఈ వీడియోను అప్‌లోడ్ చేసిన గంటలోనే 2.5 మిలియన్లకుపైగా లైక్‌లు రావడం గమనార్హం. కాగా సాధారణంగా సోషల్ మీడియాకు దూరంగా ఉండే ధోనీ ఇన్‌స్టాగ్రామ్‌లో 5 నెలల తర్వాత ఓ వీడియోను అప్‌లోడ్ చేయడం గమనార్హం.

వీడియోలో కనిపిస్తున్న దాని ప్రకారం రాంచీలోని తన ఫామ్‌హౌస్‌లో ఉండే పెంపుడు కుక్కలతో (pet dogs) ధోనీ తన 42వ పుట్టిన రోజు వేడుకలను జరుపుకున్నాడు. వాటితో కలిసి కేక్ కట్ చేశాడు. ఆ త ర్వాత కేక్ ముక్కలను పెంపుడు కుక్కలకు పెట్టి, తాను తిన్నాడు. కేక్ ముక్కలను ధోనీ ఒక్కొక్కటిగా విసురుతుంటే ఆ పెంపుడు కుక్కలు నోటితో అందుకుని తింటున్నాయి. వాటికి తినిపిస్తూ తాను కూడా కేక్‌లోని ఓ ముక్కను తీసుకోని తిని రుచిని ఆస్వాదించాడు. నిమిషం 29 సెకన్లపాటు ఉన్న సదరు వీడియోను తన ఇన్‌స్టాగ్రామ్ ఖాతాలో అప్‌లోడ్ చేసి.. తనకు పుట్టిన రోజు శుభాకాంక్షలు తెలిపిన అభిమానులందరికీ ధన్యావాదాలు చెబుతూ రాసుకొచ్చాడు. ప్రస్తుతం ఈ వీడియో సోషల్ మీడియాలో వైరల్‌గా మారి ధోనీపై నెటిజన్లు ప్రశంసలు కురిపిస్తున్నారు. పెంపుడు కుక్కలతో పుట్టిన రోజు జరుపుకున్న ధోని మంచి మనసును కొనియాడుతున్నారు. అంత ఎత్తుకు ఎదిగినప్పటికీ ఎప్పుడూ కూల్‌గా ఉండే ధోని.. ఒక సాధారణ మనిషిలానే ఉంటాడు. ప్రస్తుతం తన పుట్టిన రోజు వేడుకలను కూడా అంతే సాధారణంగా జరుపుకుని మరోసారి ‘కామన్ మ్యాన్’ అనిపించుకున్నాడు.