"మేడ్చ‌ల్-మ‌ల్కాజ్‌గిరి జిల్లాలో మల్కాజిగిరి నియోజకవర్గం ఒకటి. 2009 కంటే ముందు జరిగిన నియోజకవర్గాల పునర్విభజనలో భాగంగా మల్కాజిగిరి నియోజకవర్గం ఏర్పడింది. మొత్తం 4,68,822 మంది ఓటర్లు ఉన్నారు. వీరిలో పురుష ఓటర్లు 2,36,804, మహిళా ఓటర్లు 2,32,009 మంది ఉన్నారు. నియోజవర్గంలో బ్రాహ్మణ సామాజికవర్గానికి చెందిన ఓటర్లు 70 వేల మంది ఉన్నారు. అలాగే రైల్వే ఎంప్లాయీస్‌ 10 వేల ఓటర్లు, యాదవులు 45 వేలు, రెడ్డి సామాజిక వర్గానికి చెందిన వారు 30 వేల మంది ఉన్నారు. ఈ నియోజకవర్గంలో ఉప్పల్, నాచారం, మల్లాపూర్, కీసర, మేడ్చల్, బాలానగర్ మండలాలు ఉన్నాయి. 2009 ఎన్నికలు.. 2009 ఎన్నికల్లో కాంగ్రెస్ పార్టీ అభ్యర్థి ఆకుల రాజేందర్.. తన సమీప ప్రత్యర్థి కనకారెడ్డి (పీఆర్పీ) పై 9,194 ఓట్ల మెజారిటీతో గెలుపొందారు. ఈ ఎన్నికల్లో రాజేందర్‌కు 56,628 ఓట్లు, కనకారెడ్డికి 47,434 ఓట్లు వచ్చాయి. అలాగే ఈ ఎన్నికల్లో టీడీపీ తరపున పురపాలక సంఘం మాజీ చైర్‌పర్సన్ వి.కే.శారద, బీజేపీ తరపున బాలలింగం పోటీ చేశారు. 2014 ఎన్నికలు.. 2014 ఎన్నికల్లో బీఆర్ఎస్ తరపున పోటీ చేసిన కనకారెడ్డి.. తన సమీప ప్రత్యర్థి రామచంద్రారావు (బీజేపీ) పై 2,768 ఓట్ల మెజారిటీతో గెలుపొందారు. ఈ ఎన్నికల్లో కనకారెడ్డికి 77,132 ఓట్లు, రామచంద్రారావుకు 74,364 ఓట్లు వచ్చాయి. ఈ ఎన్నికల్లో టీడీపీ పొత్తులో భాగంగా బీజేపీకి మద్దతు ఇచ్చింది. 2018 ఎన్నికలు.. 2018 ఎన్నికల్లో బీఆర్ఎస్ అభ్యర్థి మైనంపల్లి హన్మంతరావు.. తన సమీప ప్రత్యర్థి రారపరాజు రామచంద్రరావు (బీజేపీ) పై 73,698 ఓట్ల మెజారిటీతో గెలుపొందారు. ఈ ఎన్నికల్లో హన్మంతరావుకు 114,149 ఓట్లు రాగా, రామచంద్రరావుకు 40,451 ఓట్లు వచ్చాయి. "