పెద్దపల్లి జిల్లా కేంద్రమే అసెంబ్లీ నియోజకవర్గాలుగా ఉంది. పెద్దపల్లి, జూలపల్లి, ఎలిగేడు, సుల్తానాబాద్, ఓదెల, కాల్వ శ్రీరాంపూర్ మండలాలు ఈ స్థానం పరిధిలోకే వస్తాయి. మొత్తం 1,98,606 మంది ఓటర్లు ఉండగా, ఇందులో 1,00,583 మంది పురుషులు, 98,003 మంది మహిళా ఓటర్లు ఉన్నారు. 2018 ఎన్నికల్లో పెద్దపల్లిలో 83.85%, 2014లో 75.94% పోలింగ్ నమోదైంది. 2014లో టీఆర్‌ఎస్‌కు చెందిన మనోహర్ రెడ్డి దాసరి 62,677 (37.35%) మెజార్టీతో గెలుపొందారు. 1952లో ఏర్పడిన ఈ నియోజకవర్గానికి పీపుల్ డెమొక్రటిక్ ఫ్రంట్ నుంచి బరిలో దిగిన ముత్తయ్య తొలి సారి ఎమ్మెల్యేగా గెలిచారు. 1962లో రాజారాం(కాంగ్రెస్), 1967లో జిన్నా మల్లారెడ్డి(స్వతంత్రుడు), 1972లో జిన్నా మల్లారెడ్డి(కాంగ్రెస్), 1978లో రాజిరెడ్డి(కాంగ్రెస్), 1983లో గోనె ప్రకాశ్ రావు(స్వతంత్రుడు), 1985లో కాల్వ రామచంద్రారెడ్డి(టీడీపీ), 1989లో ముకుందా రెడ్డి(కాంగ్రెస్), 1994లో బిరుదు రాజమల్లు(టీడీపీ), 1999లో రామకృష్ణ రెడ్డి(బీజేపీ), 2004లో ముకుందా రెడ్డి( టీఆర్ఎస్), 2009లో విజయ రమణ రావు(టీడీపీ), 2014, 2018లలో దాసరి మనోహర్ రెడ్డి గెలుపొందారు. 2018 ఎన్నికల్లో.. 2018 ఎన్నికల్లో టీఆర్ఎస్ అభ్యర్థి దాసరి మనోహర్ రెడ్డి 82,765 ఓట్లతో గెలుపొందారు. కాంగ్రెస్ అభ్యర్థి చింతకుంట విజయ రమణ రావు 74,299 ఓట్లుతో రెండో స్థానంలో నిలిచారు. ఈ ఎన్నికల్లో టీఆర్ఎస్ కు 44.33శాతం, కాంగ్రెస్ కు 39.79 శాతం ఓట్లు పోలయ్యాయి. 2023 ఎన్నికల్లో వీరిరువురే మళ్లీ పోటీ పడనున్నారు. బీఎస్పీ నుంచి దాసరి ఉషా బరిలో ఉన్నారు.