వనపర్తి జిల్లాలో కీలక నియోజకవర్గంగా వనపర్తి నియోజకవర్గం ఉంది. ఈ నియోజకవర్గంలో మొత్తం 5 మండలాలు ఉన్నాయి. అవి వనపర్తి, పెద్దమందడి, పెబ్బేరు, ఘన్‌పూర్, గోపాలపేట. తెలంగాణ రాష్ట్రం ఏర్పడిన తర్వాత వనపర్తి అసెంబ్లీ నియోజకవర్గానికి ఇప్పటి వరకు రెండు సార్లు ఎన్నికలు జరగ్గా ఒకసారి కాంగ్రెస్ పార్టీ, మరోసారి టీఆర్ఎస్ పార్టీ విజయం సాధించాయి. 2014లో కాంగ్రెస్ పార్టీ అభ్యర్థి జిల్లెల చిన్నారెడ్డి 4,291 ఓట్ల మెజారిటీతో టీఆర్ఎస్ అభ్యర్థి సింగిరెడ్డి నిరంజన్‌రెడ్డిపై విజయం సాధించారు. 2014 ఎన్నికల్లో కాంగ్రెస్ అభ్యర్థి జిల్లెల చిన్నారెడ్డికి 59,543 ఓట్లు, టీఆర్ఎస్ అభ్యర్థి సింగిరెడ్డి నిరంజన్‌రెడ్డికి 55,252 ఓట్లు, టీడీపీ అభ్యర్థి రావుల చంద్రశేఖర్‌రెడ్డికి 45,200 ఓట్లు పోలయ్యాయి. ఉమ్మడి ఆంధ్రప్రదేశ్‌లో జిల్లెల చిన్నారెడ్డి రాష్ట్ర గ్రామీణాభివృద్ధి శాఖ మంత్రిగా సేవలందించారు. అయితే 2018 ఎన్నికల్లో మాత్రం సీన్ రివర్స్ అయ్యింది. టీఆర్ఎస్ అభ్యర్థి సింగిరెడ్డి నిరంజన్‌రెడ్డి కాంగ్రెస్ పార్టీ అభ్యర్థి జిల్లెల చిన్నారెడ్డిపై 51,685 ఓట్ల మెజారిటీతో విజయం సాధించారు. దీంతో సింగిరెడ్డి నిరంజన్‌రెడ్డి మంత్రి పదవి కూడా కైవసం చేసుకున్నారు. ఈ ఎన్నికల్లో టీఆర్ఎస్ అభ్యర్థి సింగిరెడ్డి నిరంజన్‌రెడ్డి 1,11,956 ఓట్లు, కాంగ్రెస్ అభ్యర్థి చిన్నారెడ్డి 60,271 ఓట్లు, బీజేపీ అభ్యర్థి కొత్త అమర్నాథ్‌రెడ్డి 3,168 ఓట్లు సాధించారు. కాగా ప్రస్తుతం జరుగుతున్న 2023 అసెంబ్లీ ఎన్నికల్లో బీఆర్ఎస్ నుంచి సింగిరెడ్డి నిరంజన్‌రెడ్డి, కాంగ్రెస్ పార్టీ నుంచి తుడి మేఘారెడ్డి, బీజేపీ నుంచి అశ్వథామరెడ్డి పోటీ చేస్తున్నారు.